Gin-anunsyo sang Philippine Sports Commission (PSC) nga may settlement na sa tunga sang Philippine Athletics Track and Field Association (PATAFA) kag sang World No. 6 Pinoy pole vaulter nga si EJ Obiena, ang highest-ranking pole vaulter sa bilog nga Asya.
Suno sa PSC, iga-endorso na sang PATAFA si EJ agud nga makapasakop sa Southeast Asian Games kag sa World Outdoor Athletics amo man sa iban nga kumpetisyon nga subject sa regulasyon sang PATAFA.
Ginpahayag nga nagkit-anay sanday PSC chairman William Ramirez, si Obiena, kag si PATAFA President Philip Ella Juico kun sa diin nagpangayo sang pasaylo si Obiena sa PATAFA, kay Juico, sa board members, kag sa iya nga teammates.
Suno sa PSC, nagsugtanay ang duha ka kampo nga magpinatawaray kag mag-move on na sa isyu.
Apat ka bulan man nga magamo ang duha ka kampo matapos nga ginpa-imbestigaran sang PATAFA si Obiena bangud sa ginapahayag mishandling sini sang pondo nga para kuntani sa iya coach, ang Ukrainian nga si Vitaly Petrov.
Ang kontrobersiya ang nakalab-ot na pati sa Senado kag sa Kamara kag ang Kongreso mismo ang naghingyo sa PSC nga patungaan na ang amo nga gamo.
