Nagdepensa ang Office of the Building Official (OBO) nga wala sang lamod sang pulitika ang ila ginhimo nga pagkakas sang tarpaulin sang Team Sulong Gugma sa San Rafael, Mandurriao, Iloilo City.
Sa interview sang Bombo Radyo kay Engineer Mavi Gustilo, Head sang Office of the Building Official (OBO), iya ginpanindugan nga yara sila sa husto nga bahin bangud nagsunod lang sila sa pagsulundan sang syudad kag nagpadala man sang ‘notice of violation’.
Suno kay Gustilo, private man ukon commercial establishments ang nagabayolar, ginapangbaklas gid sang talatapan.
Gin-athag man sini nga kinahanglan anay makakuha sang permit halin sa ila talatapan antes magbutang sang nagakaigo nga tarpaulin, kon sa diin, tsekyaron anay nila kon nagasunod ini sa pagsulundan.
Nahibaluan nga sa idalom sang Regulation Ordinance number 2013-330 gindumulian sa syudad ang pag-install sang tarpaulin nga wala sang commercial value.
