Nagpanindugan ang Office of the Building Official nga insakto ang ila nga proseso nga ginhimo sa pagdagdag sang stoppage order sa pila ka mga proyekto sang Iloilo City District Engineering Office (ICDEO).
Sa interview sang Bombo Radyo kay Engineer Mavi Gustilo, head sang Office of the Building Official, iya ginpahayag nga indi sila makadagdag sang stoppage order ukon suspension sa isa ka proyekto kon wala sang technical findings sa ila nga technical plans.
Suno kay Gustilo, insakto lang ang una nga tikang nga ginpa-advance ang technical evaluation sa mga proyekto agud matumod kon may correction ukon wala sa ila nga plano.
Gin-athag man sini nga sa bahin sang building permit application, yara na nga daan ang application forms nga bisan indi ini kompleto kon naka-file na nga daan kag wala sang technical findings, pahanugutan nga makasugod ang isa ka proyekto.
Ginpahayag man sang natungdan nga ang ginpangdagdagan sang stoppage order nga proyekto sang nagligad, amo ang wala sang building permit applications.
Gintumod man ni Gustilo nga ginalantaw man sang talatapan ang safety sang isa ka proyekto nga nakasanto sa National Building Code.
