Ginkakibot sang Office of the Building Official (OBO) nga daw kaangay nga sila pa ang naga-guwa nga rason kun ngaa naatrasar ang pila ka mga proyekto sang Department of Public Works and Highways-Iloilo City District Engineering Office (DPWH-ICDEO).
Ini kaangot sa status sang construction sang isa ka public market kag anum ka multi-purpose buildings kun sa diin sa status report sang ICDEO, ginpahayag nga ini nga mga proyekto ang na-suspinde bangud sa pending nga permits halin sa OBO.
Ginpahayag man anay sang DPWH-ICDEO nga ginakonsiderar sini nga i-invoke ang Republic Act 11032 ukon ang Ease of Doing Business and Efficient Government Service Delivery Act agud nga ma-address ang problema sa delays sa OBO.
Sa statement naman sang OBO, ginsiling nga ang rason kun ngaa wala sang building permits nga gin-isyu amo nga wala man nag-apply ang ICDEO, kag kun may aplikasyon man nga nahatag, ang supporting documents nga nahatag ang indi bastante ukon indi compliant sa legal requirements.
Ginplastar naman ni Engineer Mavi Gustilo, head sang OBO, nga sa idalom sang National Building Code of the Philippines (NBCP), required ang engineering office nga magkuha sang permit halin sa OBO kun sa diin nalakip ang documentary kag technical requirements antes ini magsugod sa construction.
Sunod nga ipasa ang requirements kaupod sa Unified Application form para sa building permit sa OBO.
Ginpahangop man sini nga bangud nga ang lokasyon sang sini nga mga proyekto ang nahamtang sa duta sang syudad, obligasyon man sang ICDEO nga magkonsulta sa local government unit kag magkuha sang approval halin sa City Council antes ang project implementation.
Kinahanglan man suno sa natungdan nga may ma-secure nga location clearance halin sa city government para masiguro nga compliant ang proyekto sa 2021-2029 Comprehensive Land Use Plan.
WALO LANG KA PERMIT APPLICATIONS
Ginklaro man sang OBO nga base sa record halin sang 2023 tubtub subong, walo gid lamang ka permit applications ang napasa sang ICDEO.
Suno kay Engineer Mavi Gustilo, head sang OBO, sa sini nga walo, duha gid lamang ka proyekto ang na-aprubahan, isa ang may pending payment, kag lima ang ginbalik sa engineering office para sa rectification. Pahayag sang opisyal tubtub subong, inugpasa pa gihapon ang rectifications para sa sini nga lima ka mga proyekto.
Kun basehan ang rekord sang OBO halin sang 2021 tubtob 2022, yara sa 31 ka building permits ang na-approve nila para sa proyekto sang City District Engineering Office.
Matandaan nga sa bahin ni Iloilo City Mayor Jerry Treñas, sulit-sulit na sini ginpahayag ang disgusto sa pag-uyat sang DPWH-ICDEO sang infrastructure projects nga suno sa iya wala nagalab-ot sa standards kag timeline sang syudad.
