Gingisa sang myembro sang Kamara ang OCTA Reasearch Group sa diin ginkwestyon ang methods kag otoridad sini sa pagpaguwa sang mga projections kag suhestyon sa sitwasyon sang COVID-19 sa Pilipinas.
Suno sa House Committee on Good Government and Public Accountability nga ginapamunuan ni DIWA Partylist Rep. Michael Edgar Aglipay, ang nasambit nga grupo ang may yara sang madamo nga discrepancies sa ila projections sa COVID-19 cases sa pungsod.
Pahayag naman ni Minority Leader kag Marikina Rep. Stella Quimbo, ang OCTA group ang may yara sang dako nga margin of error baliskad sa ginapatihan sang grupo nga may yara lamang sila sang 5% margin of error.
Ginpakita ni Quimbo ang data sheet listing sang projections sang OCTA kag ginpaanggid ini sa data sang Department of Health (DOH) humalin sang Hunyo 29, 2020 tubtob Septyembre 5, 2021.
Napagkit nga sang Marso 8, gin-project sang grupo nga ang Pilipinas ang magaangkon sang 5,000 tubtob 6,000 nga mga kaso sang COVID-19 kada adlaw.
Apang ang pungsod ang nakaangkon sang average nga 8,971 daily infections sa katapusan nga semana sang Marso 2021 sa diin 79.4 percent gid ang deperensya sa figure nga ginpaguwa sang OCTA.
Dugang pa ni Quimbo, madamo sang “understatements kag overstatements” ang grupo sa pag-predict sang COVID-19 kag may yara sang “forecasting inaccuracies” ang OCTA reasearch.
Ginmanduan man sang iban nga mga mamalidha ang OCTA nga untatan na ang paghatag sang komentaryo sa data sang COVID-19.
Nahibaluan nga pila sa mga opisyal kag publiko ang nagabasol sa OCTA bangud sa paghimo sang projections kag rekomendasyon nga nagresulta sa lockdown sa Pilipinas apang gintawag sang grupo nga “unfair” nga sila lang ang basulon sa pagpatuman sang community quarantines bangud indi man sila kabahin sang gobyerno.
Depensa sang grupo, ang desisyon sang gobyerno ang ginabase sa data halin sa DOH kag indi halin sa ila.
