ILOILO – Nagpatigayon sang ocular inspection ang mga opisyal sang Municipal Disaster Risk Reduction and Management Office (MDRRMO) sa probinsya sang Iloilo agud mahibaluan ang kabug-usan nga halit tuga sang nagluntad nga linog kagab-i, Disyembre 26.
Ini ang direkta nga ginmandu ni Provincial Disaster Risk Reduction and Management Office (PDRRMO) head Dr. Jerry Bionat.
Sa interview sang Bombo Radyo kay Dr. Bionat, iya ginpahayag nga apisar indi tuman ka baskog ang 4.8 magnitude nga linog, dapat nga hibaluon kun may mga istruktura nga naapektuhan ilabi na sa banwa sang San Enrique nga sentro sang linog lakip na ang mga kaiping nga banwa kaangay sang Dueñas, Dingle kag syudad sang Passi.
Nagalaum naman si Dr. Bionat wala sang daku nga halit ang linog ilabi pa nga bag-o lang naglaslas ang Bagyo Ursula.
Sa bahin naman sang Iloilo Provincial Capitol, wala nakitaan sang litik ang building kag bukas ang tanan nga opisina agud mag-akomodar sang tanan nga transaction.
Kaangot naman sa pahayag sang Philippine Institute of Volcanology and Seismology (PHIVOLCS) nga posible nga may nagtuhaw nga bag-o nga fault line sa San Enrique, ginpahayag ni Dr. Bionat nga may mga kaso gid man nga apisar wala sang fault line, nagaluntad gihapon ang linog.
Nagarumpag ang duta bangud sa composition sini kag ang paghulag ang makabig nga tectonic in origin.
Isa ka halimbawa suno sa natungdan amo ang pinakamabaskog nga linog nga natabo sa Mexico sang 1954 sa diin balas-balason ang duta kag wala man sang fault line sa lugar.
Ginpakigbahin man ni Dr. Bionat nga malapit sa San Enrique nahamtang ang Mt. Dayuso ukon ang ginatawag sang kalabanan nga ‘Patay nga Bulkan’.
May yara suno sa natungdan sang mga pamatuod nga naglupok ang bulkan madugay na nga tuig ang nakaligad, rason nga nagporma nga lahar ang lava, nagtig-a, kag nabuka-buka.
Suno kay Dr. Bionat, indi ini pamahog sa publiko kag bangud nga ‘tectonic in origin’ ang rason sang linog, wala ini sang kaangtanan sa amo nga bulkan.
