ILOILO CITY – Ginaduso sang City Environment and Natural Resources Office ang pagpatigayon sang mga lihok agud nga mahagan-hagan ang gas emission sa syudad sang Iloilo.
Sa ginpatigayon nga pagsinapol sang Solid Waste Management Board, ginduso ni City Environment and Natural Resources Office Head Engr. Noel Hechanova nga magpatigayon sang odd-even scheme kag amo man ang pagpatigayon sang smoke emission test sa mga salakyan nga amo ang pinakamayor nga rason sang air pollution.
Sa interview sang Bombo Radyo kay Iloilo City Councilor Ely Estante, chairman sang Committee on Environment sa konseho, iya ginpahayag nga mas makapaayo kun magdihon ang Iloilo City Council sang smoke belching ordinance agud nga mahatagan sang pina ang mga nagalapas sa pagsulundan.
Ginpahayag ni Estante nga indi lamang ang mga salakyan ang rason sang air pollution kundi lakip man ang mga industrial facilities ukon power plant, pagluto ukon pagsunog sang mga basura kag ang natural gas emission.
Sa ginaduso nga odd-even scheme kag pagpatigayon sang smoke belching, ginpahayag sang natungdan nga may yara ini sang bentaha kag disbentaha.
Bangud sini, magasapol liwat ang mga katapo sang Solid Waste Management Board agud istoryahan ang tuhoy diri.
Nahibalu-an nga lakip sa mga nagtambong sa pagsinapol kahapon nga adlaw amo sanday Iloilo City Police Office Director Police Col. Martin Defensor Jr., Mr. Jojo Jamerlan, Deputy Chief for Operations sang Land Transportation Office 6, Mr. JV Mabilog sang Public Safety and Transportation Management Office kag ang mga tiglawas sang Department of Environment and Natural Resources Office kag Department of Public Works and Highways.
