Odicta group, padayon sa illegal drug ops – PNP
ILOILO CITY – Ginkumpirma sang Iloilo City Police Office (ICPO) nga padayon ang illegal drug operation sang Odicta Drug Syndicate Group.
Sa interview sang Bombo Radyo Iloilo, ginpahayag ni Iloilo City Police Office director S/Supt. Remus Zacharias Canieso, base sa ila intelligence gathering, padayon ang operasyon sang iligal nga droga sang ginakabig right hand ni Odicta nga si Rolando Torpio.
Pamatuod diri suno kay Canieso ang halos P500,000 nga balor sang shabu nga nakuha sa puluy-an ni Torpio sang gin-raid sang Philippine Drug Enforcement Agency (PDEA).
Magluwas kay Torpio, ginpahayag ni Canieso nga namonitor man nila ang iban nga high value target padayon man sa ila transaksiyon sang iligal nga droga.
Ginatugyan na ni Canieso sa PDEA ang pagpangdakop sa mga yara sa drug list samtang wala pa ginbalik ang Oplan Tokhang sa PNP.
Ginpasiguro naman sang ICPO nga padayon ang ila kampanya sa pagtapna sang iligal nga droga paagi sa paghatag sang impormasyon sa mga law enforcement agencies.