Ginpakamalaot sang Office of the LGBTQ Affairs ang ang paggamit ni Iloilo City Councilor Romel Duron sang terminolohiya nga “inagi” sa ila indi pag-intindihanay ni Councilor Sedfrey Cabaluna.
Sa interview sang Bombo Radyo kay Gab Umadhay, focal person sang Office of the LGBTQ Affairs, iya ginpahayag nga wala ginatolerar sang talatapan ang amo nga tinaga ilabi nga ginaduso sa syudad ang inklusibo nga komunidad.
Suno kay Umadhay, kinahanglan nga untaton na ang stigma nga kon magsambit sang tinaga nga “agi” ginakumpara gilayon bilang isa ka “weak” ukon mahina.
Gintumod man sini nga apisar nga naintindihan ukon wala ang nasambit nga tinaga, indi ini excuse agud nga gamiton sa sitwasyon nga nagapakanubo sa isigkapareho gamit ang indi makontrolar nga emosyon.
Gin-athag man sang natungdan nga indi ini manami pamatian ilabi na kon maghalin sa mga lideres nga may poder kag otoridad.
