Ginmanduan na sang Office of the Ombudsman ang pila ka mataas nga opisyal sang gobyerno nga magsumiter sang ila counter-affidavit kasunod sang reklamo nga ginpasaka ni Senator Imee Marcos nga may kaangtanan sa pagdakop sang anay Presidente Rodrigo Duterte.
Ang mando sang Ombudsman ang naghalin sa hingyo ni Marcos nga imbestigaran ang papel sang mga opisyal sa pag-aresto kay Duterte sang International Police.
Lakip sa mga ginmaduan sang counter-affidavit amo sanday Justice Secretary Jesus Crispin Remulla, CIDG Chief Maj. Gen. Nicolas Torre III, Interior Secretary Jonvic Remulla, PNP Chief Gen. Rommel Marbil, kag Special Envoy for Transnational Crime Markus Lacanilao.
Nagpahanumdom man ang Ombudsman nga ang kapaslawan sa pagsumiter sang counter-affidavit sa sulod sang napulo (10) ka adlaw halin sa pagbaton sang mando ang mangin basehan nga ginpabay-an sang mga nasambit nga opisyal ang ila katungdanan sa pagsabat kag ang preliminary investigation magapadayon bisan wala sila sang pahayag.
Gin-athag man sang Ombudsman nga kinahanglan ilakip sang mga opisyal ang affidavit sang ila mga testigo kag iban pa nga mga dokumento nga magasuporta sang ila depensa.
Madumduman nga nagapanindugan ang mga nasambit nga mga opisyal nga wala sang sala ang gobyerno sa natabo nga pag-aresto kay Duterte kag ginpanginwala ang mga alegasyon sang “kidnapping” .
Sa pihak nga bahin, si Duterte ang naga-edad na sang 80 anyos kag magapangatubang sang kaso nga crimes against humanity nga may kaangtanan sa iya “war on drugs” nga nagtuga sang kamatayon sang linibo ka mga indibidwal.
