ILOILO CITY – Nagmandu ang officer in charge sang Iloilo City Police Office sa tanan nga mga hepe sa syudad sang Iloilo nga tipunon ang tanan nga mga punong barangay agud nga hibaluon kun functional ang ila nga Barangay Anti-drug Advisory Council.
Sa interview sang Bombo Radyo kay Police Colonel Joeresty Coronica, officer in charge sang Iloilo City Police Office, iya ginpahayag nga nagalaum ini nga indi lang ang Molo Police Station ang magapatigayon sang pagsinapol sa punong barangay.
Una na nga nakasapol ni Coronica ang 180 ka mga punong baragay sa syudad kun sa diin, ginpakilala siya ni lloilo City Mayor Jerry Treñas.
Suno kay Coronica, importante nga may yara sang koordinasyon ang kapulisan sa mga barangay agud nga mahibaluan kag ma-monitor ang tagsa ka Barangay Anti-drug Advisory Council.
Nagalaum man ini nga makaupod sang Iloilo City Police Office ang mga barangay officials sa kampanyan sini batuk sa iligal nga droga.
Nagpasalig man ang natungdan nga naga-umpisa pa lamang sila kag ginahimo na ang tanan agud nga mangin positibo ang anti-illegal drug operation.
