Pormal nga nagpungko ang bag-o nga mga Officer-in-Charge sang Iloilo City Police Stations 2 kag 3 sa isa ka Turn-Over of Command Ceremony nga ginhiwat sang Hulyo 9, 2025 sa ICPO Headquarters, Camp Achilles D. Plagata, General Luna Street, Iloilo City.
Sa idalom sang liderato ni City Director, Police Colonel Kim P. Legada, ginbasa ni Police Lieutenant Colonel Lindley T. Barrientos, Deputy City Director for Administration (DCDA), ang opisyal nga mga mando sang termination kag designation.
Ginpangunahan ni PCol Legada ang seremonyal nga pag-turn-over sang command symbol kag sang Property and Equipment Inventory Book sa mga bag-o nga ginpili nga opisyal.
Si Police Captain Mavin R. Larano, anay Chief sang City Tactical and Operations Center (CTOC), amo na karon ang Officer-in-Charge sang Iloilo City Police Station 3.
Iya gintal-osan si PCapt Mary Jane P. Panes nga magapungko naman subong bilang Chief sang CTOC sa ICPO Headquarters.
Samtang si Police Captain Jeffrey S. Delgado, nga anay Officer-in-Charge sang City Intelligence Unit (CIU), amo na ang bag-o nga Officer-in-Charge sang Iloilo City Police Station 2.
Iya gintal-osan si Police Major Tranquilino P. Querubin Jr., nga yara na sa non-duty status bilang preparasyon sa iya pagretiro.
Si PLT. Romel Tabuyoc, anay Officer-in-Charge sang ICPS1, ang pagabuslan ni PCPT. Melchor Tolentino ang Officer-in-Charge sang ICPS 3.
Sa interview sang Bombo Radyo kay Police Colonel Legada, iya ginpahayag nga padayon nga magahatag sang mayo nga serbisyo publiko ang mga bag-o nga station commanders kag ang tanan nga mga opisyal sang ICPO.
Suno kay Legada, ginaduso liwat ang implementasyon sang 5-Minute Response Time Protocol sang syudad para sa epektibo nga lihok sang mga kapulisan.
Nag-upod man sa seremonya sanday Police Lieutenant Colonel Lorenez G. Losaria, Deputy City Director for Operations (DCDO), mga staff sang ICPO unit, mga station commanders, police non-commissioned officers (PNCOs), kag non-uniformed personnel.
