ILOILO CITY – Nagpa-Bombo ang mga empleyado sang Iloilo Superman Owners and Drivers Transport Cooperative bangud sa indi insakto nga paghatag sa ila sang benefits.
Sa interview sang Bombo Radyo kay Nonieto Cuacuyco, Public Assistant Officer sa nasambit nga kooperatiba, iya ginpahayag nga ginatinguhaan nila nga mapalab-ot ang ila concern apang ginapasa-pasa sila sang mga officers.
Suno kay Cuacuyco, nag-umpisa nga maggamo ang ila kooperatiba sang nagpungko ang mga bag-o nga officers sang Mayo 13.
Ginpahayag sini nga magluwas diri, wala man sila sang Social Security System, Pag-IBIG kag PhilHealth nga patimaan nga wala sila sang pag-ulikid sa kaayuhan sang ila mga myembro.
Nagsabat naman ang pamunuan sang kooperatiba kasunod sang reklamo sang ila myembro nga gindunganan pa sang untat-byahe.
Sa interview sang Bombo Radyo kay Mario Oliveros, chairman sang kooperatiba, iya ginpahayag nga nakibot sila sa ginhimo sang ila myembro bangud wala man ang mga ini nagahambal sang ila reklamo.
Suno kay Oliveros, daw kaangay nga ginasabotahe sang ila mga myembro ang operasyon sang kooperatiba.
Gin-athag man sini nga ang mga empleyado nila nga yara sa idalom sang service contracting program ang ginabaydan sang gobyerno, apang may mga kahigayunan nga nagakaatrasar man ang mga ini.
