Kinahanglan nga pat-uron sang vaccine recipient nga pareho ang data nga nakabutang sa iya nga physical vaccination card sa rekord nga amo ang naka-encode sa database sang Local Government Unit (LGU).
Abiso ini sang Department of Health (DOH) samtang ginahandaan ang pagpagwa sang digitalized, official kag unified vaccination card para sa mga tawo sa bilog nga Pilipinas.
Sa interview sang Bombo Radyo kay Dr. Bea Camille Natalaray, spokesperson sang DOH Region VI, iya ginpahayag nga ang data nga naka-encode sa computer amo ang basehan sa paghimo sang official vaccination card nga amo ang pwede magamit sang indibidwal kun magbyahe sa luwas sang pungsod.
Suno kay Natalaray, sa subong nga indi pa palareho ang vaccination cards nga gina-release sang mga LGU, kinahanglan anay nga mag-secure ang isa ka tawo sang International Certificate of Vaccination ukon yellow card kun kinahanglan niya nga ma-gwa sa iban nga mga pungsod.
Ini nga yellow card ang mahimo nga aplayan sang outbound traveler sa Bureau of Quarantine.
Kinahanglan ini kun ang padulungan nga pungsod ang naga-require sang proof of vaccination.
