NEW YORK – Naga amat-amat na nga naga guwa ang mga tawo sa New York sa pihak sang pagpamahog sang Coronavirus Disease 2019.
Suno kay Bombo International Correspondent Angeline Tiburnia direkta sa Brooklyn, New York, iya ginpahayag nga sang tinalikdan nga duha ka semana, daw kaangay nga ghost town ang New York bangud wala sang tawo nga nagaguwa apang nakibot lamang siya subong nga may yara na sang mga tawo nga naga guwa upod ang ila mga ido kag naga lagaw-lagaw.
Ginpahayag ni Tiburnia nga nakulbaan siya magguwa bangud ini ang mandu sang gobyerno agud indi man matapikan sang virus kag mangin safe man ang iya nga amo.
Nagaguwa lamang siya kun suguon siya sang iya amo nga magbakal sang pagkaon sa diin iya ginasiguro nga nakaputos ang bilog niya nga lawas humalin sa ulo tubtob sa iya nga tiil.
Nahibaluan nga may yara na sang 202,208 ka mga kaso sang COVID-19 sa New York, 17,089 ang naka recover kag 10,834 ang mga nagkalamatay.
