Nagabululigay ang mga overseas Filipino workers (OFWs) ilabi na ang mga naka-base sa pungsod Greece nga ipalab-ot ang impormasyon kaangot sa isa ka ginapahayag Ilonggo seaman nga na-confine sa ospital sa amo nga pungsod.
Sa inisyal nga impormasyon base sa Facebook post sang OFW nga si Tess Cariño, ginapahayag nga ang pangalan sang seaman amo si Harold Nicolas kag admitted subong sa Rhodes General Hospital sa sulod na sang duha ka semana.
Ginapahayag nga indi na ini maayo makahambal apang nakapanugid nga taga-Iloilo siya.
Sa interview sang Bombo Radyo Iloilo kay Conrado Rivera, isa ka OFW nga naga-trabaho man sa Greece, iya ginpahayag nga sandig sa dugang nga impormasyon nga ginsugid ni Cariño, wala gid sang may nagatatap sa pasyente kag indi na sini mahulag ang pihak nga lawas bangud sa stroke.
Indi man makumpirma dugang ang mga detalye sa iya bangud wala ini sang passport kag wala man sang identification card nga nakit-an.
Natabuan lang nga yara si Cariño sa amo nga ospital bangud nga na-ospital man ang iya nga amo.
Nagmato-mato man si Cariño nga limpyuhan ang amo nga seaman. Indi maathag kun sin-o ang nakadala sa seaman sa ospital, apang sandig sa impormasyon halin sa isa man ka pasyente, may nakabisita anay sa iya sa ospital apang wala na nakabalik.
Sunod man nga nagbululigay ang mga OFWs sa amo nga lugar. Sa Facebook, ang katapusan nga post sang amo nga seaman ang napetsahan pa sang Abril 18. Kaupod sini ang ‘Sailor’s Group Overseas Chapter’.
