Nakapauli na sa Pilipinas ang isa ka overseas Filipino worker (OFW) nga gin-rape kag ginbuno sang isa ka pulis sa Kuwait.
Suno sa statement nga ginpagwa sang Department of Labor and Employment (DOLE), yara na subong sa iya nga pamilya ang amo nga OFW matapos ini nagtinir sa Migrant Workers and Other Filipino Resource Center sa sulod sang walo ka tuig.
Suno kay Labor Attaché Nasser Mustafa, kabahin ang biktima nga si Marites Torijano sa 76 ka OFWs nga ginrepatriate ukon ginpabalik sa Pilipinas via Kuwait Airways sang Nobyembre 29.
2006 suno sa ahensya sang nagpadulong sa Kuwait ang amo nga OFW agud magtrabaho bilang domestic worker kag sang ulihi, ginsaylo ini sa dress shop.
Samtang gina-renew ang iya nga residence visa, gindakop sang Kuwaiti policeman ang biktima sang 2012.
Apang sa baylo nga dal-on sa presinto, gindala ini sa disyerto kag ginhimuslan sa sulod sang patrol car. Ginpahayag nga ginbuno pa ang biktima sa liog kag ginbilin sa disyerto.
Nagpangabudlay ang biktima nga magkamang tubtob nga nakalab-ot ini sa karsada, nakapangayo sang bulig, kag natigayon nga madala sa ospital.
2014 sang napamatbatan nga guilty ang pulis kag ginsentensyahan sang silot nga kamatayon, apang may apelar sa kaso kag napanubuan ang pamatbat sa life-sentence.
Magluwas sa pagkapreso, ginsukot man ini sang balor P3 million bilang danyos sa nahimo sa OFW.
Gindayaw naman ni Labor Secretary Silvestre Bello III ang Philippine Overseas Labor Office kag ang Philippine Embassy sa Kuwait sa pagtutok sa kaso sang nasambit nga OFW.
