OTON, ILOILO – Madugay na nga nagapangkastigo sa iya live-in partner si Melchor Amegable, Jr., 33, ang suspek sa pagpangluthang sa Barangay Mambog, Oton, Iloilo kaina sang kaagahon.
Ini ang santo sa mismo alegasyon ni Mylene Peronce, 27, ang live-in partner nga naka-quarantine sa barangay hall sa amo nga lugar nga ginluthang ni Melchor 3:00 sang aga kaina. Matandaan nga sa amo nga shooting incident, patay si Noli Legada, 55, ang barangay tanod nga nagabantay sa quarantine facility nga ginatiniran ni Mylene.
Sa exclusive interview sang Bombo Radyo kay Mylene, iya ginpahayag nga 2014 tubtob 2017, nagsuprer siya sa pagpangastigo, pagpanguga, kag wala sa lugar nga pagpamantay ni Melchor.
“Ginabawalan ya ko nga maglagaw.. kadamo [na nga bes] nga ginakastigo ya ako. Ginpa-blotter ko na sa gani diri sa Mambog kag didto sa police station nila sa Passi,” pahayag ni Mylene.
Bangud sang indi maaggwantahan nga batasan sang iya nga live-in partner, nagprangka si Mylene nga makigbulag kay Melchor sang 2018, apang wala man sang pormal nga nakasugtan bangud ‘indi man sila kasal.’ “‘Bisan sa pamilya ya, naghambal na ko nga indi na ko na sa iya ya,” pahayag ni Mylene.
Sunod nga nagtrabaho si Mylene sa Saudi Arabia kun sa diin nag-umpisa na siya sa pag-entertain sa iban nga lalaki paagi sa chat.
Nag-ako si Mylene nga matuod ang pahayag ni Melchor nga nang-block siya sa Messenger kag Facebook, apang may napadala ini sa iya nga mensahe sang una nga nagapaandam nga ‘suktanay’ sila kun mag-abot si Mylene sa Iloilo.
Pag-abot diri sa Iloilo, samtang naka-quarantine, ginpahayag ni Mylene nga masami nga nagatambay si Melchor sa quarantine facility agud nga bantayan siya.
‘Ang video call ya, normal lang na ya. Syempre may mga GC naman. Ang may gina-chat ko, ginaako ko na ya,” pahayag ni Mylene.
Las 3:00 kaina sang kaagahon, nakabugtaw si Mylene bangud sang isa ka lupok kag nakit-an nga nagahuray-ad na ang barangay tanod. Ginapahayag nga sunod siya nga gintiro, gintinguhaan pa niya nga managang, kag sang natumba siya, nagpakuno-kuno siya nga patay agud nga wala sang finishing nga matabo.
Ginpahayag ni Mylene nga ginkuha pa ni Melchor ang iya nga kulintas, bag, kag isa ka cellphone. Sang nakahalin si Melchor, didto na kag nakapangayo sang tabang si Mylene samtang wala na nakaluwas pa ang barangay tanod.
Nagapahuway-huway na subong sa ospital si Mylene bangud sang injury sa abaga kag kamot.
“Gusto ko nga madunot sa presuhan ang g*go ya! Indi na siya dira makagwa.” Pahayag ni Mylene, handa siya nga magpasaka sang kaso batok sa iya live-in partner.
Kaina sang aga sang nagsungka si Melchor sa mga pulis. Ginahanda na subong ang kaso nga murder kag frustrated murder batok sa iya. Una naman nga nagpahayag si Melchor nga tuman ang iya nga paghinulsol bangud nag-‘blackout lang siya kag nadala sa balatyagon’ sang nahimo niya ang krimen.
