Yara na sa deportation area ang Overseas Filipino Worker (OFW) nga una na nga na-report nga priso sa pungsod sang Kuwait sang Enero 26, 2026.
Ini amo si Maricris Lapatero Sacatin, residente sang Poblacion, San Rafael kag 13 na ka tuig nga naga-ubra bilang Domestic Helper sa luwas sang pungsod sa isa lang ka amo.
Sa interview sang Bombo Radyo kay Dr. Cynthia Dario, Head sang Public Employment Services Office sang Probinsya sang Iloilo, iya ginpahayag nga halin sa detention center, nasaylo na ini sa deportation area kag ginahulat nalang ang pirma sang Minister of Interior sang State of Kuwait.
Padayon man nga nagakoordinar ang PESO sa talatapan sang Overseas Workers Welfare Administration (OWWA) kag Department of Migrant Workers (DMW) bangud sila mismo ang may direkta nga komunikasyon sang gobyerno sang Kuwait.
Nahibaluan nga nalapas sang amo sang OFW ang Labor Law sang Kuwait bangud nagaubra ini bilang Part-time cook sa negosyo mismo sang iya amo nga wala sang nagakaigo nga permiso.
