ILOILO — Nagpanawagan sa gobyerno ang isa ka amay matapos nga ginsakit kag duha na ka adlaw nga wala maka-contact sa ila ang iya anak nga isa ka Overseas Filipino Worker sa Saudi Arabia.
Ang biktima amo si Karen Joy Sabido, residente sang Lemery, Iloilo.
Sa interview sang Bombo Radyo kay Nestor Sabido, amay sang OFW, iya ginpahayag nga nag-umpisa ang pagbinaisay sang iya anak kag sang amo sini, sang nagpauli ang iya amo halin sa Riyadh.
Suno kay Sabido, sang masulod na kuntani ang amo sang iya anak sa main door sang puluy-an, naka-lock ini, rason nga gintawag ang iya anak apang wala ini makabati kag ulihi na sini natalupangdan ang iya amo sa sagwa bangud nga yara ini sa CR.
Ginpahayag man sang amay nga sang ginbuksan na ang pwerta, gilayon nga ginlagas kag ginhampak sang amo ang iya anak rason nga nagkuha ini sang video.
Sugod sang amo to nga adlaw, wala na naka-contact ang iya anak sa ila agud mangamusta sa diin, duha lang ini ka beses nga nakatawag sa ila subong nga bulan.
Nagpangayo naman sang bulig sa gobyerno ang amay sang OFW agud mahatagan sang atensyon ang iya anak bangud wala na sila makahibalo sa sitwasyon sini sa Saudi.
Nagalaum naman ini nga mahatagan sang igtalupangod sang agency sang iya anak ang problema agud makapauli ang na diri sa Iloilo.
