METRO MANILA – Wala pa sang impormasyon ang mga Overseas Filipino Workers nga na-stranded sa Metro Manila kun san-o sila makapauli sa Iloilo.
Ini matapos nga ginkansela ang flight sang 150 ka Overseas Filipino Workers nga natalana kun tani nga magpauli subong nga adlaw, Abril 14.
Sa interview sang Bombo Radyo kay Ivy Porras Cabillon, nagatrabaho sa cruise ship, iya ginpahayag nga sa subong, temporaryo sila nga nagatinir sa isa ka hotel sa Binondo, Metro Manila matapos nagpauli sang Marso 22 halin sa Abu Dhabi.
Suno kay Cabillion, nakapaidalom na sila sa 14 ka adlaw nga quarantine kag nagalaum nga makapauli subong nga adlaw matapos nabalitaan nga may una nga batch sang Overseas Filipino Workers nga sakay sa barko halin sa Cebu nga nakadungka sa syudad sang Iloilo.
Ginpahayag ni Cabillion nga wala sang problema para sa ila ang pagpaidalom sa quarantine kag rapid test bangud nga ang importante amo nga masigurado nga negatibo sila sa virus.
