DOHA, QATAR – Nagakinot ang Overseas Filipino Workers nga nadulaan sang trabaho sa Doha, Qatar bangud sa Coronavirus Disease 2019 (COVID-19).
Suno kay Bombo International Correspondent Jerry John Batolina, ‘No Work, No Pay’ ang kadam-an sa mga empleyado bangud sa ginapatuman nga lockdown.
Ginpahayag Batolina nga bastante man ang food assistance nga ginahatag sa ila apang kinahanglan sa gihapon nga magkinot tubtub nga makatibawas sa krisis.
Bangud nga limitado ang pagguwa sa ginatiniran nga balay, bisan ang pagsaulog sang Holy Week sa Qatar ang ginpaagi na lang sa online.
Sa iya bahin suno sa natungdan, bukas sa gihapon ang hotel nga iya ginatrabahu-an kag may yara lang sang quarters para sa ila nga mga empleyado.
Ang mga kalan-an naman sa Doha lakip na ang restaurant nga ginapanag-iyahan sang kompaniya nga ginatrabahu-an ni Batolina ang ginpasirado kag mahimo nga sa masunod pa nga bulan magabukas.
Magluwas sa food assistance, may yara man sang $200 nga ayuda para sa mga nadulaan sang trabaho apang ang ginaproblemahan lang nila sa subong amo ang supply sang matinlo nga tubig bangud nga kinahanglan pa nila nga magbakal agud nga may mainom.
