KUWAIT – Nagakahangawa ang mga Overseas Filipino Worker sa Kuwait nga magpauli sa Pilipinas nga wala sang dala nga kwarta.
Ini ang ginpahayag sang Overseas Filipino Worker nga si Janice Gania sang Guimaras, sa pihak sang ginapangatubang nga krisis tuga sang tensyon sa tunga sang Iran kag Estados Unidos kag ang deployment ban kasunod sang kamatayon ni Jeanelyn Villavende.
Sa Good Morning Philippines program, ginpahayag ni Gania nga wala siya nahadlok sa giyera apang mas nahadlok siya nga magpauli nga wala gid sang dala nga kwarta para sa iya pamilya.
Suno kay Gania, walo na siya ka tuig nga nagatrabaho sa Kuwait kag iya gid nga ginapasalamatan nga lunsay maayo ang iya employer.
Ginpahayag ni Gania nga mismo siya ang nakasaksi nga may mga Overseas Filipino Worker nga yara sa makaluluoy nga sitwasyon kag nagakadapat nga buligan agud nga indi mangin kasubong sa nadangatan ni Villavende.
May kaangtanan sa deployment ban, ginpahayag sang natungdan nga pabor siya sa nasambit nga lihok para sa seguridad sang mga Pilipino apang minimal lamang ang epekto sini sa ekonomiya sang Kuwait bangud nga mahimo man sila nga magbaton sang domestic helper gikan sa iban nga pungsod.
Sa pihak sini, ginpahayag ni Gania nga in demand gid ang mga domestic helper nga Pilipino bangud sa kalidad sang pagtrabaho.
