RIYADH – Nagapanawagan sang bulig ang masobra 20 ka Overseas Filipino Workers (OFWs) sa Riyadh, Saudi Arabia agud makapauli na sa Pilipinas bangud sang ginasuprer nga epekto sang coronavirus disease 2019 (COVID-19) pandemic.
Suno kay Bombo International Correspondent Jaye Biglete direkta sa Riyadh, kapin tatlo ka bulan na siya kag ang mga kaupod niya nga mga Overseas Filipino Workers nga wala sang trabaho sa amo nga lugar.
Ini bangud natapos na ang ila kontrata bilang staff workers sa isa ka ospital kag imposible man suno sa iya nga mag-apply pa sila bangud sang nagligad pa nga tuig, nahisugtan na sang kompaniya kag sang mga empleyado kun sin-o ang magapadayon kag kun sin-o ang magapauli sa ila tagsa ka pungsod.
Ginpahayag sang natungdan nga wala man sang nagalaum nga may ma-eksperyensyahan nga pandemya, kag mas malala suno sa iya ang iya kondisyon bangud naga-isahanon siya nga may expired nga visa kag passport.
Sa subong suno kay Biglete, naka-book na ang ila ticket apang wala pa sang kumpirmasyon nagikan sa airline company kun san-o sila sarang makabyahe pabalik sa Pilipinas.
Problema sa pagkaon ang ginasuprer sang mga Overseas Filipino Workers — rason nga ang kwarta nga para kuntani sa ila pamilya ang nagasto na agud masustiner ang nagapanguna nila nga kinahanglanaon.
Ginpahayag pa ni Biglete nga ang tanan nga concern sang kaupod niya nga mga Overseas Filipino Workers ang ginatinguhaan man nga ipalab-ot sa embahada apang tubtob subong, wala pa sang nagasabat sa ila mga palamangkutanon.
Magluwas sa problema sa pinansyal, nagakahangawa man ang mga Overseas Filipino Workers sa ila ikaayong lawas bangud may yara sang mga foreign workers sa lugar nga nagpositibo na sa COVID-19.
Sa kabug-usan, ang Saudi Arabia ang may yara sang 105,283 ka kumpirmado nga kaso sang COVID-19, 746 ang patay, samtang 74,524 naman ang naka-recover.
