TURKEY – Ginapaaligmat ang Overseas Filipino Workers kasunod sang mabaskog nga linog sa Aegean Sea kun sa diin nabatyagan ang pagtay-og sa Turkey kag Greece.
Suno kay Bombo International Correspondent Carmela Eusebio, apisar nga tuman ka layo ang iya gina-istaran sa Istanbul apang mabatyagan sa gihapon ang mabaskog nga pagtay-og.
Ginpahayag ni Eusebio nga 8 tubtub 10 ka oras ang byahe halin sa Istanbul padulong sa syudad sang Izmir nga lubos nga naapektuhan sang linog.
Sa Istanbul suno kay Eusebio, wala sang reported aftershocks kag damage, indi kasubong sa Izmir nga madamo nga building kag balay ang naguba kag may mini tsunami pa nga nagluntad sa Aegean island sang Samo.
Bangud sini, nagpaguwa sang abiso ang Embahada sang Pilipinas sa Turkey nga likawan ang pag-panic kag likawan man ang pagpadulong malapit sa mga nagkalaguba nga building bangud sa epekto sang aftershocks.
Nahibalu-an nga santo sa data, indi magnubo sa 30 ang patay samtang masobra naman sa 800 ang pilason sa magnitude 7.0 nga linog.
