ILOILO CITY- Ginplastar sang OIC- Director sang Iloilo Police Provincial Office ang iya mga prayoridad sa iya pagpungko sa posisyon.
Sa interview sang Bombo Radyo kay Pol. Col. Gilbert Gorero, iya ginpahayag nga hatagan niya sang igtalupangod ang reporma sa hanay sang kapulisan agud nga mangin positibo ang panan-awan sang pumuluyo sa ila bilang mga tawo nga may dignidad kag ginarespeto.
Suno kay Gorero, tutukan man niya ang internal cleansing sa diin insigida nga pahalinon sa serbisyo ang mga pulis nga wala sang plano nga magbag-o para sa kaayuhan.
Dugang pa ni Gorero, iya man nga pasangkaron ang law enforcement operations sang kapulisan kag mangin strikto sa pagpatuman sang mga ordinansa kag kasuguan.
Nahibaluan nga gin-assign si outgoing IPPO Director Pol. Col. Paul Kenneth Lucas bilang Chief Directorial Staff sang PNP-Finance Service sa Camp Crame bilang kabahin sang promotion.
Ang nabakantehan nga posisyon ni Lucas ang ginbuslan ni Gilbert Gorero nga amo ang nagaserbe nga pinuno sang Regional Plans and Strategy Management Division sang Police Regional Office 6.
