ILOILO CITY – Gindayaw ni Philippine National Police (PNP) Chief Pol Lt General Archie Francis Gamboa ang performance sang Police Regional Office (PRO) VI kaangot sa mga kaso sang iligal nga droga sa Western Visayas.
Kadungan sang pagbisita ni Gamboa sa PRO VI, iya ginpahayag nga maayo ang pagpamuno ni Regional Director PBGen Rene Pamuspusan kag posible nga indi ini ma-relieve sa puwesto.
Suno sa opisyal, sa Enero 2020, may yara sang re-evaluation sang mga accomplishment sang mga RDs, kag kun makit-an ang kinahanglanon sa pag-reshuffle, indi siya magpang-alang-alang sa paghimo sini.
Lakip man sa re-evaluation ang paglantaw sa performance sang support units kag D-staff.
Kaangot sa re-evaluation, ginpahayag ni Gamboa nga kinahanglan lang nga makapasar ang performance sang mga RDs sa standards nga iya gintalana sa mismo pagpungko niya sa pwesto sang Oktubre subong nga tuig.
Basehan man ang pamatasan sang mga RDs.
Nagpaandam naman si Gamboa sa pila ka mga PROs nga may mahina nga performance.
Suno sa opisyal, kun indi pa mapauswag ang performance antes ang evaluation sa Enero 2020, mahimo nga atubangon nila ang posible nga konsekwensya kaangay sang pagka-relieve kag reshuffling.
