Iloilo – Gin-athag sang Antique Provincial Government nga indi pa 100% nga kontrolado ang oil spill nga nagdangat sa Caluya, Antique nga resulta sang naglugdang nga barko sa Oriental Mindoro.
Sa interview sang Bombo Radyo kay Mr. Broderick Train, Provincial Disaster Risk Reduction and Management Officer sa Antique, indi pa ma-contain ang oil slick nga pakadto sa mainland Antique.
Suno kay Train, ang isla sang Caluya ang nagsalo sang tanan nga oil spill kun sa diin, may yara pa sang nagapabilin nga langis.
Ginpahayag dugang sang natungdan nga gina-imbestigaran sang mga local agencies ang halit nga epekto sang nagtagas nga langis sa mga isda, seaweeds, kag mangrove ukon bakawan.
Nahibaluan nga ginpaidalom ang banwa sang Caluya sa state of calamity matapos naglab-ot sa tubig ang pagtagas sang langis.
Ginsuspinde man ang mga aktibidad sa pagpangisda sa mga isla sang munisipyo.
Matandaan nga naglugdang ang MT Princess Empress sang Pebrero 28 sa Naujan, Oriental Mindoro nga may karga 800,000 nga litro sang industrial oil.
Magluwas sa Oriental Mindoro kag Antique, naglab-ot man sa Palawan ang oil spill.
