Posible nga dagdagan sang kaso kag penalidad sang gobyerno sang Taiwan ang isa sa ila Olympic flagbearers bangud sa pagsuksok sini sang uniporme sang China.
Ginapahayag nga ginkaakig sang mga opisyal sang Taiwan ang online post ni Olympian Huang Yu-ting.
Gilayon naman nga ginpanas sang babaye nga atleta ang iya social media post matapos makabaton sang mga pagpakamalaot.
Naghampang ang 33-anyos nga si Huang sa 2022 Beijing Winter Olympics duha ka semana na ang nagligad.
Depensa naman sini sa mga nagapadako sang isyu, dapat nga mangin sports na lang ang mga tawo kag dapat nga untatan na ang paghaboy sang pagpakamalaot.
Suno naman sa mga opisyal sang Taiwan, nagapatigayon na sila sang imbestigasyon may kaangtanan sa insidente.
Nahibaluan nga ginapanindugan sang China nga sakop sa gihapon sang ila nga pungsod ang Taiwan.
