JAPAN – Ginkumpirma sang Tokyo Olympics organizers nga may yara sang isa ka overseas visitor nga nakasulod sa Tokyo Olympics Village nga nagpositibo sa COVID-19.
Ini ang una nga gin-report nga kaso sa amo nga village kun sa diin nagatinir ang linibo ka mga atleta para sa hampang nga magaumpisa sa Hulyo 23 kag magalawig tubtub sa Agusto 8.
Ginapahayag nga involved sa pag-organisar sang Olympic Games ang foreign national nga infected sang virus.
Gin-confine na ini subong sa isa ka hotel.
Samtang, ginalauman man nga makasulod na sa Tokyo Olympics Village subong nga Domingo ang mga atleta sang Pilipinas.
Akuparon sang Team Philippines ang pito ka units nga may apat ka kwarto, duha ka bathrooms, kag isa ka opisina nga magaserbe bilang medical room.
Suno kay Bombo International Correspondent Jodie Sebastian direkta sa Tokyo, Japan, tuman ka istrikto ang ginapatuman nga protocols sa sulod sang 44-hectare Olympic village sa Harumi Waterfront District.
Si Sebastian ang nagatrabaho bilang isa ka field cast volunteer kag in-charge gid sa pagpat-od nga yara ang mga kinahanglanon sang mga atleta, government officials sang iban nga mga pungsod, kag naga-inabot nga mga delegasyon.
Suno kay Sebastian, ginapalibutan sang mga camera ang bilog nga village kag indi madasig nga makalusot ang bisan sin-o sa checkpoints.
Required ang mga atleta nga magreport sang ila daily health status sa contact tracing app kag health report app.
Wala ginapahanugutan ang public transport bangud may yara sang Games-dedicated vehicles.
