Kulang sa transparency ang Office of the Ombudsman sa pagdumala sang mga pending nga kaso nga nagalakip sa mga mataas nga opisyal sang pungsod.
Ini ang panan-aw sang isa ka constitutional law expert nga si Atty. Michael Henry Yusingco kasunod sang isa sa mga ginsinggitan sa rally sang Iglesia Ni Cristo (INC) nga may “selective justice” kag “distortion of law” sa pungsod.
Subong nga adlaw, Hulyo 3, ginkasuhan si Senator Rodante Marcoleta nga isa ka kilala nga miyembro sang amo nga relihiyoso nga grupo.
Nauna naman nagsiling si Ombudsman Jesus Crispin Remulla nga wala nila ginbaton ang rekomendasyon sang Department of Justice (DOJ) may kaangtanan sa flood control-related case batok kay Senador Joel Villanueva. Sa baylo, magahimo ang Ombudsman sang ila kaugalingon nga preliminary investigation antes magdesisyon kon magsaka sang kaso sa Sandiganbayan.
Sa pihak nga bahin, sa kaso naman ni Senador Chiz Escudero, nagsiling ang Ombudsman nga nakaabot na ini sa preliminary investigation.
Sa interview sang Bombo Radyo kay Atty. Yusingco, nagsiling ini nga wala sang klaro nga ihibalo ang publiko sa matuod nga natabo sa mga kaso nga gina-imbestigahan bangud kulang ang impormasyon nga ginahatag sang Office of the Ombudsman sa ila mga press conference.
Suno kay Yusingco, amo ini ang rason kun ngaa nagaguwa ang nagkalain-lain nga mga espekulasyon nga ginamanipular ang mga kaso, may nagaluntad nga selective justice, ukon ginahungod nga hinayon ang proseso.
Ginarekomendar niya sa Office of the Ombudsman nga himuon nga mas bukas sa publiko ang ila mga imbestigasyon, labi na sa mga miyembro sang media, paagi sa paghatag sang access sa mga dokumento kag testimonya agud makita sang pumuluyo ang matuod nga kahimtangan kag dalagan sang mga kaso.
