Gin-aktohan na sang Office of the Ombudsman ang request for assistance ni Former Our Lady of Lourdes, Jaro Barangay Captain Amado Hollero.
Ini kaangot sa P39.7 million nga disallowed transaction sang Iloilo City Government sa idalom sang pagpamuno ni former Iloilo City Mayor Jed Patrick Mabilog.
Sa interview sang Bombo Radyo kay Hollero, iya ginpahayag nga Pebrero 5, 2025 sang nagsulat siya sang letter kag gilayon man nga nag-response ang Office of the Ombudsman.
Suno kay Hollero, nagsulat man ang Ombudsman sa Office of City Accountant nahanungod sa amo nga concern kon sa diin, nagpahayag ang opisina nga mangayo anay sang 10 ka adlaw agud nga makasabat.
Gintuad man sini nga luyag lamang niya nga mahibaluan ang natabo sa disallowed transaction kag hatagan igtalupangod sang Ombudsman ang amo nga concern.
Luyag man sang natungdan nga masabat ni Mabilog ang amo nga transakyon agud maklaro ini sa publiko.
Nagapati man ini nga ang Ombudsman ang may ikasarang agud nga ma-address ang issue kag malab-ot ang anay alkalde.
Gin-athag man ni Jollero nga wala sang lamod pulitika ang iya tinutuyo kag bisan sin-o ang may kinamatarong agud magpamangkot natuhoy sa amo nga transaksyon.
