Gina-imbestigahan na sang Office of the Ombudsman ang procurement sang COVID-19 equipment kag non-payment benefits bangud sa “fallen health workers” humalin sang tunga-tunga sang 2020.
Suno kay Ombudsman Samuel Martires, lima ka opisyal sang Department of Health (DOH) ang ginpaidalom sa preventive suspension sang Oktubre 2020 bangud sa imbestigasyon.
Ang motu proprio investigation pahayag sang Ombudsman ang may kaangtanan sa pagbakal sang test kits, personal protective equipment kag iban pa nga emergency purchases; lakip man ang non-payment sa “fallen health workers” kag mga infected sang virus; amo man ang mga kapaslawan kag inefficiencies nga nagtuga sang pagtaas sang numero sang napatay kag infected nga mga medical frontliners.
Sunod nga tikang nga pagahimuon sang Ombudsman suno kay Martires amo ang pag-review sang COA report kag ipaanggid ini sa ila nga findings agud madetermina kun may yara bala sang admninistrative ukon criminal liability angot sa financial transactions sang DOH.
Ang imbestigasyon ang maga-focus sa pagdetermina sang nangin kabangdanan sang indi husto ukon mismanagement kag pag-identify sang areas nga masami nagakatabo ang kurapsyon.
Ang resulta sang sini nga imbestigasyon ang ipalab-ot sa concerned agency kag sa Kongreso.
Dugang pa ni Martires, ang annual audit report sang COA ang dako nga bulig sa ila nga imbestigasyon.
