ILOILO CITY – Ginpanginwala sang Office of the Ombudsman-Visayas kag Department of Interior and Local Government (DILG) nga may ginauyatan ang mga ini nga dismissal order batok kay Iloilo City Mayor Jed Patrick Mabilog.
Ginpahayag ni Atty. Pio Dargantes sang Ombudsman Region 6 sa interview sang Bombo Radyo, nga wala sila sang may ginauyatan nga dismissal order kag kun may ara man, gilayon nila ini i-serbe kag ipahibalo sa publiko bangud high ranking official ang alkalde.
Suno naman kay DILG-6 director Atty. Anthony Nuyda, wala man ini sang ginauyatan nga mando nga ginapahalin na sa puwesto ang alkalde.
Iya pa ini ginapausisa sa DILG central office, apang wala pa sang sabat ang ahensiya.
May kaangtanan ini sa kaso nga ginpasaka ni anay Iloilo provincial administrator Manuel Mejorada batok kay Mabilog bangud sa ginaalegar pagbutig ni Mabilog sa iya Statement of Assets, Liabilities and Net Worth (SALN).
Ginpahayag sa Bombo Radyo ni Atty. Mark Piad, spokesman kag legal counsel ni Mabilog, kagab-i pa siya nakabaton sang impormasyon sa ginapahayag dismissal order batok sa city mayor.
Apang sang iya gin-usisa sa talatapan ni Mabilog, wala man sang may nabaton nga mando gikan sa Ombudsman ukon DILG.
Mangin ang complainant nga si Mejorada ang wala man sang nabaton nga impormasyon kun may desisyon na ang Ombudsman sa kaso nga ginpasaka niya batok kay Mayor Mabilog.