Ginkumpirma sang Office of the Ombudsman nga may ara na ini sang 42 ka testigo sa mga reklamo nga plunder, graft, bribery kag money laundering batok kay anay House Speaker kag subong Leyte Representative Martin Romualdez.
Ini may kaangtanan sa kontrobersiya sa mga proyekto para sa flood control.
Suno kay Assistant Ombudsman Mico Clavano, 28 sa mga testigo amo ang mga bag-o, samtang 14 naman sa 18 nga gintawag nga “maleta boys” ang nagapabilin bilang mga testigo.
Gin-akusaran sang Ombudsman sanday Romualdez kag anay Ako Bicol Representative Zaldy Co sa pagtipon kag pagkuha sang ginabulubanta 56 bilyon pesos nga ill-gotten wealth halin 2022 tubtob 2025.
Nahibaluan nga apat sa 18 ka “maleta boys” ang nagbawi sang ila mga nauna nga pahayag.
Suno naman sa abogado ni Romualdez, 32 ka anay tinawo ni Co ang nag-atras sang ila mga alegasyon batok sa anay House Speaker.
Suno kay Clavano, indi ang kadamuon sang mga testigo ang importante, kundi ang kalidad kag kredibilidad sang ila mga pahayag.
May impormasyon man ang Ombudsman nga posible nga ginbayaran ang pila ka testigo agud bawi-on ang ila mga testimonya.
Padayon naman nga ginapanginwala ni Romualdez ang mga alegasyon.
