Ginpasalig sang Office of the Ombudsman nga patigayunon sini ang maid-id kag patas nga pag-usisa kaangot sa ginaalegar nga missing declarations ni Vice President Sara Duterte sa iya nga Statement of Assets, Liabilities and Net Worth (SALN).
Ini kasunod sang referral sang National Bureau of Investigation (NBI) nga ginsumiter sa talatapan sang Martes, Oktubre 13, kun sa diin nabutang ang resulta sang fact-finding investigation sini sa SALN sang bise presidente.
“The Office of the Ombudsman confirms receipt of the referral from the NBI concerning the SALN of Vice President Duterte. The Office assures the public that the matter will be handled thoroughly, independently and without any political color,” suno sa Ombudsman.
“The referral and its supporting documents will undergo an initial evaluation to determine the appropriate action, including whether further investigation is warranted, in accordance with established procedures and applicable laws,” dugang sini.
Sa sulat nga ginpadala kay Ombudsman Jesus Crispin Remulla, ginpahayag sang NBI nga ang Ombudsman amo ang nagapanguna nga ahensya nga may hurisdiksyon sa mga kaso sang korapsyon sa gobyerno sandig sa nakabutang sa 1987 Constitution kag Republic Act No. 6770.
Nagsugod ang imbestigasyon sang NBI kasunod sang mga alegasyon sang dismissed police officer nga si Rodulfo Gracioso Jr. nga anay miyembro sang security detail ni anay House Speaker Lord Allan Velasco.
Gin-alegar ni Gracioso nga nagdala siya sang mga maleta nga may unod nga kuwarta para kanday Vice President Duterte, anay Presidente Rodrigo Duterte, kag Davao City First District Representative Paolo “Pulong” Duterte kasunod sa ginapahayag nga mando ni Velasco.
Ginbanta ni Gracioso nga masobra P2-billion ang kabug-usan nga kuwarta nga iya nadala para kay Sara Duterte. Apang, ginpanginwala sang bise presidente, ni Congressman Duterte, kag ni Velasco ang mga alegasyon.
Sa impeachment trial naman, ginpresentar sang testigo sang prosekusyon nga si Atty. Alex Cabrera nga sandig sa jointly filed SALNs kag iban pa nga financial records, mahimo maglab-ot sa P817-million tubtob P1.5-billion ang manggad sang mag-asawa nga Sara Duterte kag Atty. Manases Carpio nga ginapatihan nga unexplained wealth.
Suno kay Cabrera, naangkon niya ang amo nga konklusyon matapos usisaon ang mga SALN, rekord sang transaksyon kag deposito sa bangko, bayad sa insurance, income tax returns, kag mga rekord sang negosyo sang mag-asawa nga Duterte-Carpio.
Maga-resume ang trial sa Nobyembre 9 para sa tyempo sang defense nga magpresentar man sang ila ebidensya sa amo nga article of impeachment.#
