Gindagdagan sang anum ka bulan nga preventive suspension si Senate Sergeant-at-Arms Retired General Mao Aplasca kasunod sang lukpanay kag ginamo sa sulod sang Senado sang Myerkules sang gab-i, Mayo 13, antes ang pagpalagyo ni Senator Ronald “Bato” Dela Rosa.
Gin-anunsyo ni Ombudsman Jesus Crispin “Boying” Remulla ini nga development sa iya press briefing subong nga hapon.
Antes sini, gin-ako ni Aplasca nga siya ang una nga nagpalupok sang warning shot bilang kabahin sang ila “rules of engagement.”
Suno sa iya, ginahimo ini kun yara na sa peligro ang kabuhi sang ila mga katapo agud mapilit ang pihak nga kampo nga mag-atras.
Suno pa kay Aplasca, nakita nila nga armado sang malaba nga pusil ang mga indibidwal gani nagpatuman sila sang verbal challenge.
Ginsugo nila ini nga magpakilala kag ipapanaog ang ila armas, apang bangud sang agresibo nga tindog kag hulag sang pihak nga grupo, napilitan siya nga magpalupok, nga amo ang nag-trigger sang pagbayluhanay sang lupok.
Ginpahayag man ni Aplasca nga wala sila sang intensyon nga iguon ang amo nga mga tawo nga nagpakilala nga agents sang NBI.
Sa iya update subong nga adlaw, ginpahayag man sini nga wala sang na-recover nga CCTV footage nga nagapakita sang hulag sang Senate security personnel kag Philippine Marines kadungan sang ginamo kag gunfire incident.
Ginpahayag ini ni Aplasca sang ginpamangkot siya natuhoy sa mga ebidensya nga posible magamit sa pormal nga imbestigasyon. Pahayag niya, ang lamang posisyon sang mga agent sang National Bureau of Investigation (NBI) kag ang punta sang “tactical personnel” sang Senado ang nadala sang ila gin-review ang footage.#
