ILOILO CITY – Wala pa sang data ang Department of Health Western Visayas Center for Health Development sang severity ukon kalala sang sintomas sang narecord nga labing-una nga kaso sang omicron subvariant XBB.1.16 ukon ‘Arcturus’.
Ang infected amo ang 16-anyos nga menor-de-edad nga residente sang probinsya sang Iloilo.
Sa interview sang Bombo Radyo kay Dr. Bea Camille Natalaray, Medical Officer IV sang Department of Health Region 6, iya ginpahayag nga nagapadayon sa gihapon sa pag-verify ang opisina sang data sang pasyente kun paano kag diin nakuha ang virus.
Nagpanugyan naman ang eksperto sa publiko nga kinahanglan i-practice ang minimum public health standards, hibaluon kun immunocompromised, magsuksok sang face mask kag mas maayo gid nga magpabakuna batok sa coronavirus disease 2019 ukon magpa-booster shot.
Nahibaluan nga as of April 25, may yara sang 4,255 active coronavirus 2019 cases sa Pilipinas.
Samtang, may yara naman sang 78.4 million nga Pilipino ang fully vaccinated, 23.8 million ang nakabaton na sang first booster dose, kag 4.4 million ang nakakuha sang second booster shot.
