Makabig nga isa ka ‘once in a lifetime’ ang eksperyensya sang mga Pinoy sa Rome, Italy sa pagtambong sa misa kasunod sang selebrasyon sang ika-500 nga anibersaryo sang Kristiyanismo sa Pilipinas nga ginpangunahan ni Pope Francis.
Sa interview sang Bombo Radyo kay Reverend Father John Tadifa direkta sa Rome, Italy, iya ginpahayag nga ginbanta masobra 100 ang Pinoy nga nagtambong sa St. Peter’s Square nga amo ang isa ka daku nga plaza sa atubang sang St. Peter’s Basilica.
Hugot man nga ginpatuman suno sa iya ang istrikto nga physical distancing kag iban pa nga minimum health protocols.
Suno kay Tadifa, paagi sa widescreens nga ginpahamtang sa piazza sa gwa sang basilica, makabig nga maswerte sila nga mga Pinoy bangud live nila nga nasaksihan ang misa.
FRONTLINERS SA PAGTUO
Ang mga Pinoy ang ginakabig nga frontliner sa patag sang pagtuo sa Rome, Italy.
Sa interview sang Bombo Radyo kay Reverend Father Ricky Gente, direkta sa Rome, Italy, iya ginpahayag nga isa siya sa mga nag-organize agud makatipon ang mga Pinoy nga magatambong sa misa ni Pope Francis kasunod sang 500th nga anibersaryo sang Kristyanismo sa St. Peter’s Basilica.
Suno kay Gente, tuman ang iya kalipay bangud mahapos nga matipon ang mga Pinoy bangud sa mag-an kag masinadyahon nga personalidad.
Pinaagi sa paghugpong nila suno sa natungdan, nangin isa ka makahulugan nga ila personal nga nasaksihan ang nasambit nga misa sagwa sang Vatican .
Ginpahayag sang natungdan nga ang may mga ticket lamang ang nakasulod sa Vatican.
Apang ang wala naman sang ticket ang nakalantaw live sang misa pinaagi sa mga widescreen.
