Nag-abante na ang Filipina tennis star nga si Alex Eala sa masunod nga round sa Miami Open matapos ginlutos ang German veteran nga si Laura Siegemund sa Round of 64 matchup subong nga kaagahon.
Naglawig sang tatlo ka oras kag 20 minutos antes dalayon nga napierde ni Eala ang world no. 52 tennis player, 6-7 (6/8), 6-3, 6-3.
Nagapang-29 subong si Eala sa official rankings kag pang-50 naman sa live rankings.
Ginpakita sini liwat ang iya trademark fighting spirit apisar nga ginkabos ini sa first set. Suno sa iya, kun may natun-an man siya sa iya eksperyensya sang nagligad nga tuig, ini amo ang mas pag-improve sa pisikal nga aspeto.
“It definitely was close. Very demanding physically and mentally but that was one of my goals last year after this tournament was to improve physically and here I am, fresh as a flower,” pahayag sini sa postgame interview.
“I think I’m really pleased with how I’m handling everything as a whole. A lot of things have changed for me especially this year and this season so I think I’m doing a good job of keeping that balance of being hungry and staying happy and still working hard,” dugang niya.
Sang 2025, nangin bantog si Eala matapos ang historic run sa Miami.
Ginlutos sini ang tatlo ka Grand Slam champions lakip na si World No. 2 Iga Swiatek antes siya napierde ni Jessica Pegula sa semifinals.
Posible nga si Swiatek ukon si World No. 50 Magda Linette ang atubangon ni Eala sa masunod nga round.
Ang Miami amo ang pang-walo na nga tournament ni Eala subong nga 2026 kasunod sang iya stints sa ASB Classic, Australian Open, Philippine Women’s Open, Abu Dhabi Open, Qatar Open, Dubai Tennis Championships, kag Indian Wells Open.
Importante ang mangin resulta sang hampang para kay Eala bangud na-reset na ang 390 points nga iya nakuha sang 2025 kag maga-reflect na sa masunod nga WTA rankings.
