ILOILO CITY – Ipatuman na ang One Entrance, One Exit Policy sa Iloilo City Hall umpisa sa Lunes, bilang kabahin sang precautionary measures batok sa Coronavirus Disease 2019 (COVID-19).
Sa interview sang Bombo Radyo kay Mitch Antiqueña, building administrator, iya ginpahayag nga ang entrance ang yara sa atubang sang Plaza Libertad samtang ang exit naman ang yara sa atubang sang Kerr Building.
Suno kay Antiqueña, lain ang linya sang mga empleyado samtang lain naman ang linya sang mga sibilyan nga magasulod sa Iloilo City Hall.
Ang kada isa suno kay Antiqueña ang kinahanglan nga magdala sang Identification Card kag kinahanglan nga magsulat sa logbook.
Magluwas diri, ang mga taalatapan nga may yara sang madamo nga kliyente ang halinon sa ground floor agud nga mangin mas mahapos ang transaksyon.
