ILOILO CITY – Ipatuman ni Iloilo City Mayor Jerry Treñas ang one strike policy kadungan sang pagbawi sang Executive Order 146 ukon ang Liquor Ban sa syudad sang Iloilo.
Sa interview sang Bombo Radyo kay Treñas, iya ginpahayag nga wala na sang abiso nga igahatag kag iya gilayon nga ipasirado ang commercial establishment nga magalapas sa pagsulundan kadungan sang pagdula sang Liquor Ban paglampas sang 2:00 sa kaagahon.
Ginpahayag ni Treñas nga mahimo nga sa Lunes pa niya mapirmahan ang Executive Order nga nagabawi sa Liquor Ban bangud nga madamu pa siya sang may igalakip sa guidelines.
Lakip sa mga pagsulundan nga nakasaad sa manifesto amo ang pagdumili sa pagbaligya sang makahulubog nga ilimnon sa mga menor de edad, pagdumili sa mga uniformed personnel nga mag-inom sa sulod sang balay-ilimnan, may yara sang functional nga Closed Circuit Television Camera sa sulod sang commercial establishment kag may yara sang bouncer ukon security personnel para sa seguridad.
Kadungan sini, ginpahayag man sang alkalde nga nagpabutyag sang pagsuporta ang Philippine National Police tuhoy sa pagdula sang Liquor Ban.
Bilang balos, ginpahayag sang alkalde nga iya nga pagahatagan sang dugang nga patrolcars kag augmentation force ang Philippine National Police sa pagbantay sa palibot sa tion nga madula na ang Liquor Ban.
