ILOILO CITY – Ipatuman gid ni Iloilo City Mayor Jerry Treñas ang One Strike Policy may kaangtanan sa mga commercial establishment nga nagalapas sa Executive Order 46 ukon General Bar Guidelines.
Sa interview sang Bombo Radyo kay Treñas, iya ginpahayag nga iya hulaton ang sabat sang siyam ka mga commercial establishment nga naglapas sa pagsulundan.
Suno kay Treñas, iya nga hibaluon ang mga sabat sang siyam ka mga commercial establishment kun bala nagakadapat na sila nga bawian sang business permit ukon hatagan sang ika duha nga kahigayunan nga makanegosyo.
Ginpahayag ni Treñas nga iya na nga gin-aprobahan ang hingyo ni Mr. Norman Tabud nga pinuno sang Business Permit and Licensing Office nga hatagan sang notice ang mga commercial establishment kag sa maabot nga Martes, mahimo nga makapaguwa na siya sang desisyon.
Samtang, tuhoy naman sa natabo nga pagmaoy kag hana nga pagpalupok sang armas-luthang ni Jail Officer 2 Iris Lizada sang Bureau of Jail Management and Penology-Pototan sa sulod sang Saxxy’s Bar and Grill, ginpahayag ni Treñas nga tuman ka importante ang pagpatuman sang body frisking kag inspection sa mga dala sang customer nga nagasulod sa commercial establishment.
Suno sa alkalde, nakasaad sa General Bar Guidelines nga dapat may yara sang security personnel sa sulod sang commercial establishment para sa safety sang tanan.
Magluwas diri, nakasaad man sa guidelines nga ginadumili-an ang mga katapo sang law enforcement agency nga mag-inum sa mga pampubliko nga lugar.
Ang mga nasambit nga pagsulundan ang ginlapas sang isa ka bar sa Smallville Complex sa distrito sang Mandurriao.
