Ginpa-Bombo sang mga residente ang ongoing construction sang flood mitigation structure sa Barangay Rizal, Lapuz Sur, Iloilo City bangud sa madugay ini nga matapos kag nagatuga sang uhol sa ila.
Ang proyekto ang sa idalum sang Department of Public Works and Highways (DPWH) Iloilo City District Engineering Office nga nagapahamtang sang mga drainage sa kilid sang dalan nga naga-umpisa sa barangay hall sang Lapuz Sur pakadto sa Jalandoni Estate Lapuz.
Ang ongoing construction ang naga-occupied sang halos isa gid ka lane sa lugar kag temporaryo nga sirado ang naman ang pihak nga bahin sang dalan nga amo ang ginakay-o.
Bangud sini, ginareklamo sang mga residente ang uhol nga tuga sang proyekto ilabi na kun rush hour nga nagapugok sang trapiko.
Sa interview sang Bombo Radyo kay alyas Rose, amo ang nagpa-Bombo, iya ginpahayag nga naapektuhan ang kita sang iya nga karinderya bangud nga wala na sang igo nga parkingan kag indi na makahapit sang matawhay ang iya mga customer, amo man ang baho nga nagahalin sa kanal.
Suno sa iya, daku man ang iya kabalaka sa naga-ongoing nga pagkay-o sang drainage bangud wala pa ang mga ini sang tabon nga makahatag peligro sa mga motorista kag nagalabay sa lugar.
Pahayag pa niya nga may yara na sang indibidwal nga nasamaran matapos nga nalapakan sini ang kabilya nga nagalabaw sa kalsada.
Dugang pa sang nagpa-Bombo nga ila gid nahibaluan ang importansya sang proyekto apang ila ginaghingyo nga matapos na kuntani sa makadali nga tion agud mabalik sa normal ang dalagan sang trapiko kag maluwas sa peligro ang mga residente.
