Miag ao, Iloilo – Nagalaum ang mga onion farmers sa banwa sang Miagao, Iloilo nga makaangkon sang mas madamo nga produksyon sang bombay subong nga tuig.
Sa interview sang Bombo Radyo kay April Joy Depamaylo, Agricultural Technologist sang Miag-ao, Iloilo, iya ginpahayag nga 26 ka mga barangay ang nagapatubas sang bombay.
Suno kay Depamaylo, nagaamat-amat na sila sa pagsugod sa pagtanom subong nga Enero agud maani ini sa bulan sang Hunyo.
Ginpahayag sang natungdan nga sang nagligad nga tuig, tuman ka gamay ang patubas nila nga bombay bangud sa pila ka mga bagyo nga nag-agi rason nga namierdehan man ang mga mangunguma sang bombay.
Dugang niya, paagi sa pagpatubas sang mas madamo nga bombay subong nga tuig, mahagan-hagan ang pagtimbuok sang presyo sang amo nga high value crop.
Nagalaum naman si Depamaylo nga suportahan sang gobyerno ang mga mangumguma paagi sa mga programa agud mapasanyog ang produksyon sang bombay.
Nahibaluan nga may yara sang masobra 400 ka mga onion farmers sa Miagao nga ginakabig nga onion capital sa Western Visayas.
