ILOILO CITY – Daku ang bulig sang social media sa pagtib-ong sang literacy kag pag-engganyo sa mga pamatan-on nga magpabilin sa sulod sang balay ilabi na subong nga may yara sang Coronavirus Disease 2019 (COVID-19) pandemic.
Sa Good Morning Philippines program, ginpahayag ni Alester John Gallarda sang Guimaras, founder sang Karito Volunteer Group, nga ang tagsa-tagsa ang may yara sang ikasarang kag katungdanan agud nga makabulig.
Suno kay Gallarda, karito ang nangin inspirasyon kun nga-a natukod ang Karito Volunteer Group agud pamatud-an nga sala ang pagpati sang kadam-an nga ang mga pamatan-on ang nahuyog na sa social media kag wala sang ikasarang sa paghatag sang bulig.
Ginpahayag ni Gallarda nga ang ila grupo ang nakapatigayon na sang relief operations kag nakapanghatag naman sang food assistance sa frontliners sa bulig sang partner organizations kag indibidwal.
Magluwas diri, ginasentrohan sa subong sang grupo ang ginapatigayon nga Online Spoken Poetry Competition nga nagaduso sang literacy kag naga-engganyo sa pamatan-on nga likawan ang pagguwa sa balay santo sa ginapanugyan sang health experts.
Ang Online Poetry Competition ang may tema tuhoy sa mga pamatan-on kag sa mga nagakatabo subong sa Pilipinas.
May kaangtanan diri, ginpahayag sang natungdan nga sa Mayo 20, iga-anunsyo na ang tatlo ka magadaug kag ang tagsa ka winner ang may mabaton nga premyo.
