Mas madasig na nga makita sang mga himata ang pantyon sang ila pinalangga sa kabuhi sa palaabuton nga Pista Minatay tungod sa Online Puntod Finder nga iya sang Manila North kag South Cemetery.
Suno sa Manila Public Information Office (MPIO), mahimo ini nga ma-access sa online links sang Manila North kag South Cemetery agud mahibaluan ang eksakto nga lokasyon sang mga lulubngan agud nga mangin matawhay ang pag-obserbar sang All Saints’ Day kag All Souls Day sa Nobyembre 1 kag 2.
Ginpahayag man ni Manila North Cemetery Director Dandan Tan, gin-umpisahan na ang pagpanglimpyo kag pagkay-o sang mga dalanon sa sulod sang patyo agud malikawan ang ano man nga klase sang aksidente sa nasambit nga lugar.
Dugang pa niya, ginabawalan ang pagdala sang mga ginadumilian nga mga gamit sa sulod sang patyo kaangay sang iligal nga droga, armas, speaker, sigarilyo, makahulubog nga ilimnon, animal pets, kag gamit para sa sugal.
Gina-abisuhan man ang publiko nga indi makasulod ang tanan nga sahi sang salakyan kaangay sang motorsiklo, e-bike, e-trike, bisikleta, scooter, kag monowheel.
Text by: Bombo Shaine Toleran
