MASSACHUSETTS – Padayon nga nagasaka ang kaso sang mga nagpositibo sa coronavirus disease 2019 sa Massachusetts.
Suno kay Bombo International Correspondent Ruben Gedangoni direkta sa Massachusetts, iya ginpahayag nga may yara na sang kabug-osan nga 13,837 ka mga kumpirmado nga kaso sang Covid-19 sa lugar samtang 260 diri ang nagkalamatay.
Suno kay Gedangoni, nagpanawagan si Boston Mayor Martin Walsh nga ipatuman ang curfew sa lugar kag magsuksok sang mask sa tion nga maguwa sa guwa samtang nagataas ang kaso sang COVID-19 positive sa lugar.
Maga umpisa ang curfew 9:00 sang gab-i tubtob 6:00 sa aga.
Ginadumilian man nga magpadulong sa mga pampubliko nga aktibidad amo man sa mga lugar agud malikawan nga matapikan sang virus.
Lunsay mga essential lang nga mga persona ang makaguwa sa lugar kaangay sang mga health workers.
Bangud sa nagadamo nga kaso sang COVID-19, ang mga open field ang ginahimo na lamang nga mga ospital kaangay sang cultural event center kag football stadium agud nga matatapan ang tanan nga mga pasyente.
