Naglab-ot na sa ginatos ang nakumpiska sang Local Government Unit (LGU) sang Janiuay nga mga modified mufflers.
Sa interview sang Bombo Radyo kay Janiuay, Iloilo Mayor Paulino Parian, iya ginpahayag nga ang mga nakumpiskar nga mga mufflers ang ginpangmaso kag gin-dispose sang mga kapulisan.
Suno kay Parian, ginpanugyan na sini sa Janiuay Municipal Police Station nga ipatuman ang istrikto nga pag-implementar sa pagdakop sa mga magahod nga mufflers sa ila banwa.
Ginpahayag man sini nga kon sa aga kag hapon, wala masyado sang may mabatian nga open mufflers nga nagataris sa banwa, bangud masami sila nga gab-i nagaguwa.
Nagkoordinar man ang natungdan sa mga barangay officials nga bantayan ang mga indibidwal nga nagagamit sang open mufflers agud nga mauntat na ang pagtuga sini sang disturbo sa mga residente.
Nagpasalig man ang alkalde nga ginapatawag sini ang katapo sang traffic enforcers agud nga mas mapahugot ang pagbantay sa mga nagabayolar sang ordinansa.
