Patigayunon karon sa hapon sa sa probinsya sang Antique ang opening ceremony sang Western Visayas Regional Athletic Association (WVRAA) Meet 2025.
Opisyal nga magabukas ang regional sports meet paagi sa parada. Ginalauman man nga masobra sa 5,300 ka delegasyon halin sa Aklan, Antique, Capiz, Guimaras, Iloilo, kag Negros Occidental ang magatipon para sa daku nga programa.
Antes ini nga programa, ginpatigayon man ang solidarity meeting sa Binirayan Gymnasium, San Jose, Antique nga gintambungan sang coaches kag technical officials agud nga mapahibalo ang final instructions sa pagsugod sang event.
Suno kay Dr. Nicasio Frio, Schools Division Superintendent sa Antique, nakapatigayon na sila sang serye sang coordination meeting sa mga tiglawas sang Philippine National Police, Philippine Army, Bureau of Fire Protection, Department of Public Works and Highways, Water Works kag Provincial Disaster Risk Reduction and Management Council agud masiguro nga safe kag matalunsay ang kahiwatan.
Ang tanan nga 18 ka mga banwa sa Antique ang gin-tap sang Provincial Government sa diin tanan nga district supervisors ang ginbutang sa 7 ka mga billeting schools nga tiniran sang mga delegates halin sa nagkalain-lain nga probinsya.
Nagapatigayon man ang monitoring kag inspection ang Provincial kag Municipal Health Office sa billeting areas.
Nahibaluan nga sang nagligad nga tuig, ginpatigayon ang regional sports meet sa Bacolod City kag Negros Occidental kun sa diin nakuha sang Iloilo ang kampyonato.
Sang amo nga tion, gintiglawas sang masobra 800 delegates ang Iloilo kag nakuha ang championship titles sa tanan nga lebel nga ginalakipan sang Elementary, Secondary, Paragames, kag Demo Sports categories.
